Antonije Pušić, poznatiji pod imenom Rambo Amadeus, muzičar, ekološki osviješten umjetnik i jedna od najpoznatijih muzičkih ikona Balkana, u zadnje vrijeme priprema novi materijal koji će biti, kako sam kaže, kombinacija novog i starog, kako bi nam svima bilo zanimljivo slušati ga. Za naš sajt pristao je razgovarati o svom ekološkom angažmanu, politici i društvu uopšte, a kako je to izgledalo, pročitajte ispod. Svima nam je poželio zdravlje i zdrav razum.

Prije nego pređem na ozbiljnije stvari, sjetih se kviza koji si vodio nekad prije rata, zajedno sa Jasnom Beri? Ima li šanse da nekad u budućnosti gledamo ponovo nešto slično Turbo Lilihipu i da li bi Rambo to uopšte volio raditi?

Pa, taj kviz je bio neobična, ali precizna parodija vremena i prilika koje su nas okruživale, kritika besmisla rata i besmisla podjele ljudi po nacionalnoj i vjerskoj pripadnosti. Svako vrijeme pruža nove mogućnosti izraza, pa bih, da dođem sada u priliku da radim erotski kviz, sigurno bio kritika današnjeg vremena, vremena klerikalizacije i tajkunizacije. Naravno, sa Jasnom Beri je bilo pravo zadovoljstvo raditi. Naravno i sa Suadom Kapić, režiserkom ovog neobičnog serijala. 

Ko god prati tvoj rad, viđao te u ulozi ekološkog savjetnika. Imaš li jedan ekološki savjet za naš portal?

Kad kupujete peć na drva, uzmite peć koja ima najbolji energetski razred, uštedjeće vam za dvadeset godina hiljade evra, i spasiće stotine kubika šume. Dihtujte vrata, prozore i gumice na česmama, i to će vam takođe uštedjeti puno para.

Čuo sam, ne znam koliko je to istina, da voziš elektronski automobil. Koje su prednosti, i je li bilo ozbiljnijih kvarova? Zvučiš li kao trolejbus ili je to sasvim normalan automobil?

Pa ovaj koji sam ja dobio je neki kineski, prilično je bio spor, išao je 20 km/h, pa je pravio zastoje. Najbolje je voziti mali auto na plin, to je svakako trenutno najisplativije i najekološkije.

Beograd, u kojem provodiš mnogo vremena, je jedan od gradova sa najviše zelenila na Balkanu, a opet često čujemo primjedbe na račun gradonačelnika. Zašto je to tako? Jesi li razmišljao o kupovini jednog platana na Bulevaru?

Pa, nikada nije previše zelenila i nikada nije previše zasaditi još jedno drvo, gdje god se može. Naročito u gradu gdje je kiseonik u deficitu.

Gdje ćemo te moći slušati u 2013. godini i hoće li biti nečeg novog uskoro?

Upravo spremam novi program, pravim novo, prepravljam staro, da bi nam svima bilo interesantno, i meni, i publici.

Šta očekuješ s političke strane u ovoj godini da se desi na našem području? Ima li nam spasa?

Mora hitno da se napravi neko zajedničko, koordinaciono tijelo čitavog Balkana, za početak za koordinaciju borbe protiv poplava, suša i požara, a kasnije treba koordinisati i prostorne planove, planove razvoja, da bi nam svima bilo bolje.

Kao neko ko živi u Amsterdamu, sjetih se da si i ti proveo jedno vrijeme ovdje. Kakav je to bio grad za život u to vrijeme? Je li bilo tad holandskog nacionalizma?

Holanđani su svoj nacionalizam iživjeli kad je trebalo, prije 500 godina. Izuzetno su otvoreni, prijatni, obrazovani i vrijedni.

Imaš li neku političku poruku za čitaoce u BiH?

Ne. Samo želim svima zdravlje, pamet i snagu, da se uhvate sa izazovima koje donosi sadašnjica. Treba biti strpljiv, bistar i vrijedan. Ne dozvoliti da vas političari zbunjuju svojim kontradiktornostima, slušajte sebe i zdrav razum.

Fotografije: mladina.si i danubeogradu.rs

Intervju je objavljen na portalu http://www.novinar.me, decembra 2012. godine.